Sa init ng panahon ngayon, naiisipan mo pa bang humigop ng mainit na kape? Eh tsaa? Bakit hindi, kung nasa Baguio City ka lang naman. Ano pa't walang kasing sarap ang humigop ng kape habang hinahaplos ka ng malamig na simoy ng hangin habang pinagmamasadan mo ang kahabaan ng nagluluntiang kabundukan ng Baguio City. Yay!
Sa sobrang hilig naming magkape at tumambay, napadpad kami sa isang coffee shop sa SM City Baguio. Ito ang Syblings Nook Cafe na matatagpuan sa Skyline Terrace, 2nd flr back Veranda sa loob ng SM City Baguio. Kahit malapit na ang summer ay hindi mo mararamdaman ang init ng panahon sa Baguio City. At sa lamig ng panahong iyon kaya kami nagkagustong magkape. Partner ang yosi at masasarap na kwentuhan, wala nang mashihigit pa sa pagkakataong iyon.
  |   |
Kilala ang Baguio City bilang lugar ng strawberry sa ating bansa. Kaya sigurado kaming dito namin matatagpuan ang masasarap na strawberries. Ngunit hindi namin inasahan na sikat din pala sa Baguio ang strawberry na tsaa. At sa kagustuhan naming matikman iyon ay dali-dali kaming umupo sa mga bangko sa labas ng Syblings Nook Cafe. Sa halagang P80 ay may Strawberry Hot Tea na kami na sulit para sa dalawang tao. Napakasarap din ng Strawberry Cheesecake topped with fresh strawberries sa halagang P95. Kung hindi naman kayo mahilig sa mainit na kape/tsaa, maari nyong subukan ang Nutty Hazelnut Frappe sa halagang P110. Mayroon din sila ng Cold Coffee/Espresso at iba pang malalamig na inumin na swak na swak ngayong papalapit na summer.
 |  |
Tunay na sulit ang aming pagtambay. Dahil sa ganitong mga pagkakataon kaya namin gustong magbakasyon sa Baguio City. Napakamura ng bilihan at walang kapantay ang saya dahil sa masasarap na pagkain, magagandang tanawin at masasayang tao.
